‘सरपंच परमीट रूम, ’उपसरपंच चहा’...अशा नावांना तीव्र हरकत, नगरमधून थेट मुख्यमंत्र्यांकडे तक्रार

‘सरपंच परमीट रूम, ’उपसरपंच चहा’...अशा नावांना तीव्र हरकत, नगरमधून थेट मुख्यमंत्र्यांकडे तक्रार 



नगर- राज्यात परमीट रूम, हॉटेल, दुकाने, चहाचे हॉटेल यांना सरपंच किंवा उपसरपंच अशी नावे दिल्याचे पाहायला मिळते. मात्र, अशी नावे देणे हा त्या संवैधानिक पदांचा अवमान असून ती रद्द करण्यात यावीत, अशी मागणी राहुरी तालुक्यातील सोनगाव ग्रामपंचायतीचे उपसरपंच व नगर दक्षिण भाजपा ओबीसी युवा मोर्चाचे जिल्हा उपाध्यक्ष किरण पाटील अंत्रे यांनी केली आहे. आपण स्वत: उपसरपंच असल्याने रस्त्याने अशी दुकानांची नावे पाहून चीड येते, असेही त्यांनी म्हटले आहे. याकडे दुर्लक्ष केले तर उद्या मुख्यमंत्री किंवा अन्य घटनात्मक पदांच्या नावांचा अशा पद्धतीने केला जाऊ शकतो, अशी भीतीही त्यांनी व्यक्त केली आहे.

उपसरंपच अंत्रे यांनी यासंबंधी नगरचे जिल्हाधिकारी डॉ. राजेंद्र भोसले यांना एक निवेदन देऊन अशी नावे कोणी दिली, त्यांची नोंदणी कोणी केली याची चौकशी करून ती रद्द करण्याची मागणी केली आहे. याशिवाय हीच मागणी अंत्रे यांनी मुख्यमंत्री उद्धव ठाकरे, पालकमंत्री तथा कामगार मंत्री हसन मुश्रीफ यांच्यासह विविध पदाधिकारी आणि अधिकाऱ्यांकडेही केली आहे. 

अंत्रे यांनी म्हटले आहे की, सरपंच या पदाला कायद्याने मोठे महत्त्व आहे. आपण सरपंचांना गावाचे प्रथम नागरिक समजतो. मुंबई ग्रामपंचायत अधिनियम १९५८-५९ मधील कलम ३० नुसार ही पदे संवैधनिक आहेत. त्यांचा वापर अलीकडे व्यवसायाची नावे आणि जाहिरातीसाठी केला जात आहे. कापड दुकान, बार, रेस्टॉरंट, चहाची हॉटेल अशा अनेक ठिकाणी ही नावे पाहायला मिळतात. अशी नावे घेऊन नोंदणीसाठी गेलेल्यांना अन्न व औषध प्रशासनाकडून अगर अन्य नोंदणी कार्यालयांकडून परवाने कसे मिळतात? हे योग्य आहे का? याची चौकशी करण्यात यावी. रस्त्याने जाताना हॉटेल, ढाबा व अन्य ठिकाणी सरपंच, उपसरपंच अशी नावे वाचून अक्षरशः चीड येते. या संवैधानिक पदाच्या नावांचा अशा प्रकारे दुरुपयोग व अपमान होत आहे. प्रशासन आणि सरकारने याची गांभीर्याने दखल घेतली गेली नाही तर भविष्यात अनेक आस्थापना, बार, अथवा हॉटेलांना मुख्यमंत्री, उपमुख्यमंत्री, गृहमंत्री किंवा आयुक्त, जिल्हाधिकारी, तहसीलदार अशी नावे दिलेली पहायला मिळतील. या प्रकारामुळे या महत्वाच्या पदाबरोबरच आपला महाराष्ट्र अपमानित होऊ नये एवढीच माफक अपेक्षा आहे, असेही अंत्रे यांनी म्हटले आहे.

0/Post a Comment/Comments

Previous Post Next Post