2 ऑक्टोबरच्या ग्रामसभेस ग्रामसेवक युनियनचा विरोध, ग्रामविकास मंत्र्यांना निवेदन

 


2 ऑक्टोबरच्या ग्रामसभेस ग्रामसेवक युनियनचा विरोध, ग्रामविकास मंत्र्यांना निवेदन



2 ऑक्टोबरच्या ग्रामसभांना ग्रामसेवक युनियनचा विरोध : एकनाथ ढाकणे


नगर : राज्याच्या ग्रामविकास विभागाने 2 ऑक्टोबर रोजी राज्यातील ग्रामपंचायतींना ग्रामसभा घेण्याची परवानगी दिली आहे. ऑफलाईन किंवा ऑनलाईन पध्दतीने ग्रामसभा घेण्याचे निर्देश देण्यात आले आहेत. मात्र सरकारच्या या निर्णयाला महाराष्ट्र राज्य ग्रामसेवक युनियन डी.एन.ई.136 ने विरोध दर्शविला आहे.  राष्ट्रीय सण 15 ऑगस्ट, 2 ऑक्टोबर, 1 मे या दिवशी ग्रामसभा नको असे धोरण निश्चित झालेले असताना ग्रामविकास विभागाने सदर परिपत्रक काढणे ही विसंगती असून ग्रामसभा आयोजनाचे परिपत्रक रद्द करण्याची मागणी ग्रामसेवक युनियनचे राज्य अध्यक्ष एकनाथ ढाकणे व राज्य सरचिटणीस प्रशांत जामोदे यांनी केली आहे.

याबाबत ग्रामविकास मंत्री हसन मुश्रीफ यांना पाठविलेल्या पत्रात नमूद करण्यात आले आहे की, ग्रामसभा घेण्याबाबत धोरण निश्चित करण्यात आलेले असून मे, ऑगस्ट, ऑक्टोबर महिन्यात तसेच 26 जानेवारीला ग्रामसभा घेण्यात याव्यात असे स्पष्टपणे नमूद आहे. असे असताना मागील शासन निर्णय संदर्भ विचारात न घेता पुन्हा पुन्हा नव्याने पत्र, परिपत्रक काढले जातात. त्यामुळे या ग्रामसभा धोरणाची यशस्वी अंमलबजावणी होत नाही. 27 एप्रिल 2018 च्या धोरणाची अंमलबजावणी करून 2 ऑक्टोबरच्या ग्रामसभेचे पत्रक रद्द करावे, अशी मागणी निवेदनात करण्यात आली आहे.

0/Post a Comment/Comments

Previous Post Next Post